المدونة النهائية - ياسر
مرحباً,
بهاي المدونة شاركت وياكم بعض الأشياء اللي جنت اسويها بهذا تحدي ال29 يوم, التحدي مالتي بي شقين, الاول هو اكمال الكتاب المختص بالبرمجة بلغة C, الثاني هو أن اعالج السبب اللي يمنعني اصلا ان اكمل قراءة كتاب, وهذا التحدي جان صعب ولازال, التغلب على الاكتئاب شي موسهل, وقياسه ايضا شي مو سهل, فحاولت اقيم نفسي عن طريق اكمال عدد اوراق من الكتاب بوقت معين وهذا خلاني افشل, لأني اني جنت كأنما دا ابدي من جديد, مثل شخص سوه عمليه لرجله وجبرها لوقت طويل لدرجة نسى شلون يمشي بعدين من فتح الجبس.
صح التحدي مالتي بلش بقراءة كتاب من اجل ان اتعلم برمجة واطور نفسي حتى اشتغل بالمجال, وعلى امل انه اجبر نفسي بالتحدي -والمحفز هو الجائزة- واكمل الكتاب ومن اكمله تلقائيا راح تتحسن نفسيتي وراح اكون شخص انتاجي اكثر وراح اتطور بالبرمجة واكمل بيها واتخلص من الاكتئاب بعد هالعملية(هذا جان تصوري).
ولكن اتضح بمرور الوقت انه مجرد محاولة اجبار نفسي على ان اكمل كتاب علمود اتخلص من الاكتئاب ورا ما اكمله؟ هذا مراح ينفع ب شي ولا راح يوصلني لنتيجة حقيقية, لأنه اني اذا ما فزت بالتحدي راح ارجع مثل قبل واسوء لأن طريقة التحدي جانت غلط التحدي جان انه اكمل الكتاب بس مع اهمال كبير لجزء انه شلون راح اكمل الكتاب واني بهالحالة الغبية اللي تتوقع ان الكتاب هو المشكلة الوحيدة! لا المشكلة اعمق من هيج وتتعلق باشياء هواي, ولمن ادركت هذا الشي بديت احاول احللهن واشتغل عليهن بجانب التحدى الاول وهو اكمال قراءة الكتاب... وبهالطريقة اني مراح اكون نادم ولا اكتئابي راح يزيد مثلا في حالة انه مفزت بالجائزة.
بهذا التحدي استعاديت جزء لابأس به من لياقتي الفكرية وتعاملي مع الاشياء من حولي, كان تمرين مفيد جدا واتمنى لو ينعاد ولكن بطريقة اخرى افضل, صح ورا ماخلص رجعت حسيت باكتئاب وره كم يوم لأن اكو ضغوطات مستمرة واشياء بعدها مواضحة ومجهولة بحياتي بس تعلمت شون افهمها واواجها بطريقة افضل، والمفيد بهذا التحدي انه خلاني ارجع للLine مالتي شوية وهذا شي الآني ممتن له من هذا التحدي, والشي الثاني التعلمته انه اكمل اذا غلطت بشي او مصار مثل ما اريد او معبرت عن نفسي بصورة صحيحة, لأن من ابدي بشي واتركه عقلي يضل يوسوس ويستهلك طاقة وميوصل لنتيجة لأنه ميريد يبدي شي جديد بما انو هو عنده اشياء بعدها معلقة وبعدها مكامله, وهذا احد الاسباب الرئيسية اللي خلتني اكمل هذا التحدي طبعا.
مع انه احس نفسي مضبطت او التزمت بشكل كبير لأن هو جزء من العملية انه لازم انطي مجال لنفسي حسب مانصحوني بعض الاصدقاء, لكن التحدي خلالي نوع من الخط اللي يساعدني انه ماابقه واكف وحتلو امشي بخطوات قليلة وبسيطة المهم ما اضل.
راح اشارككم هنا بعض الاشياء الصارت وياي وصور وياها...
بالبداية...
جنت اريد اروح gym لأن طاقتي صفر طول اليوم وعندي غضب مكبوت اريد اعبر عنه واطلعه بطريقة ما قبل لا انفجر, بس بنفس الوقت لياقتي جانت كلش قليلة,واكلي مخربط ونومي مخربط فبديت قتال اول اسبوع الى حد 10 ايام واني احارب اريد اعدل نومي. واغير اكلي. وبديت بكل الطرق احاول...وهنا بديت اطبخ لنفسي الاكل مثل ما اريد...
بروكلي مع بطاطس وبهارات
ورا ماعدلت نومتي شوية, بديت يومية امشي من الظهر لليل, صح ارجع ميت من التعب, واحيانا اخر اليوم من اوصل للقطار تجيني افكار سيئة من التعب واحس باليأس من كلشي,
بس المهم عندي جان انه اسوي شي وماابقه واكف, وحتلو احس بكآبه مو طبيعية دائما, فعالاقل اني دا اطلع وامشي اذا مكدرت اسوي غير شي, وازيد لياقتي وما ابقه بالبيت, واعود نفسي انه اطلع دائما; لأنه من اعود نفسي اطلع واتعب دائما لدرجة مااكدر اوكف بالباص, هنا اني دا انطي رسائل لجسمي حتى يتغير, واحاول أاهل نوعاً ما نفسي حتى ادخل gym لأن اخاف ادخل اله واني بهالمستوى من اللياقة الجنت بيه وقلة الطاقة وسوء النوم والتغذية مجتمعات.
بالبداية قضيت تقريبا 3 ايام افكر وين اروح ماادري, بعدين اني اعرف انه اكو منطقة اسمها بشكتاش حلوة, فرحتلها ونزلت بمكان بيها وبقيت امشي وماادري وين رايح لكن هدفي جان انه ابقه امشي وبمحاذاة الجسر مال بسفور... صح جنت امشي وحدي ومشيت هواي لكن هذا اليوم بده يغير كلشي ومن يومها بديت اطلع امشي كل يومين 3 عالأقل اذا مو يومية.
 |
| طبعا كلش احب التصوير واهتم بالصور واحاول اطلعها زينة |
وقبل هذا كله جنت احس بالانزعاج لأنه ملابسي صارت قديمة واستحي اطلع بيهن بس ماعندي الرغبة او "الواهس" انه اروح للمول واشتري هدوم لأن اني نحس بالهدوم وجسمي ضعيف مو كلشي يرهم عليه واختياري للموديلات ايضاً دقيق... فيحتاجلي طاقة معينة حتى بس اروح واشتري ملابس هههه بس المهم رحت... واشتريت وبعدين طلع مشكلة بالقياس ورجعتهن ورا اكثر من اسبوعين رغم كالولي ميصير وميرجعوهن لكن من سألت بداخل المحل طلع الموضوع طبيعي والكل يرجع القياس الغلط وهذا ذكرني انه دائما نتحقق من الاجابات بنفسنا وماكو شي ثابت...
بعد يوم المشي ببشكتاش كمت احاول يوميه اطلع لمكان واغير حتلو على الاقل اروح للمحل اليمنا, لكن هذا الشي مجنت احسه يساعدني هواي واحيانا جان يزيد كآبتي هالشي لأن ارجع تعبان وانام وماسوي شي ووضعي مديتحسن بصورة مباشرة, بس لأن اني اعرف هذا الشي نتائجه تراكمية ومو آنية فبقيت احاول استمر بيه, لأن الهدف ادخل جم والجم اكيد راح يحسن المزاج والطريقة الافكر بيها ويزيد طاقتي...
مرات اروح اركب باص بعدين مترو بعدين ترام وي بعدين اركب العبارة للجانب الاسيوي من اسطنبول حتى اكون بالبحر ومن اعبر للأسيوي امشي هناك... طبعا هذا التنقل جان مرهق لان ازدحام واغلب الوقت اضل واكف بالباص او المترو، وياخذ وقت طويل علما اوصل, ومن اوصل للمكان همين مااحس بفرق كبير...
 |
| هاي الصورة بالعبارة اول ما انطلقت |
 |
| وطبعاً صور الغروب احلى شي عندي... |
بعدما خلصت الاماكن اللي اعرفها ورايحلها قبل, كمت اروح للبحر(الأقرب عليه) يومية وامشي يمه وبعدين ابقه كاعد هناك لحد نهاية اليوم...
 |
| وطبعاً احب اخذ صور حتى لو الاضاءة غير جيدة |
 |
| وهاي الصورة للقمر والبحر من فوك.. |
وطبعاً خلال كل هالفترة اني جنت يومية اخلي خطط واحاول اكمل جزء من الكتاب واحاول اتغلب عالاكتئاب وازيد من رغبتي انه اسوي شي, وجانت الخطط يوميه تخرب واعدلها واكول ميخالف,
 |
| هاي خطط بيها كم صفحة لازم اقرا باليوم وكل ساعة كم صفحة اقرا حتى اكمل... |
لأن بديت الاحظ فرق بنفسي حتلو كلش قليل وممبين لآخرين بس اني داشوفه ف أكمل...
ونسيت اذكر شي مهم, وهو انه الكتاب اللي جنت اقراه بالأنكليزي, فعملية الترجمة لكل مصطلح اشوفه سواء كنت ماعرفه او اعرفه بس اريد اتاكد من معناه واحفظ طريقة كتابته, هاي العملية جانت ايضاً تاخذ مجهود ووقت كبير وكنت اترجم اغلب الكلام واكتبه بيدي على قصاصات الورق وابحث عنه بالقواميس وايضاً ابحث عن المعاني اللي تفسر هذا المعنى بغرض اقوي انكليزيتي لأن لا المدرسة فادتني بهالخصوص ولا الجامعة اللي دخلتلها هنا بتركيا...
بعض الاشياء الجانت تصير وياي حاولت احلها بالمتوفر عندي, مثلا بما انو بعدني جديد هنا بتركيا, وماعندي ميز للدراسة جان, فجنت اكعد بهالطريقة بالبداية حتى ادرس:
اكتب واترجم كلشي واسوي مخططات حتى لو كان التقدم بطيء جدا
اغير اكلي حسب ميحتاج جسمي والتزم بوجبة الريوك اهم شي
صح مكدرت اكمل الكتاب بهاي ال29 يوم.. صح الكآبه بعدها وياي... لكن تعلمت هواي من هالتجربه, وتعلمت كيف انه الالتزام بالاشياء البسيطة راح تقودنا لنتائج ولتطورات على المدى البعيد, فملازم نستهزء بالاشياء البسيطة او نهملها.. لأن على الاقل هالاشياء راح تكون اشياء انت مسويها, وحتى اذا موصلت لهدفك, راح تكون عندك اشياء انت مسويها ومحاول بكل ماعندك وبكل التكدر عليه... ويكون عندك قاعدة تستند عليها, وهي نفسك, لمن تبدي تأسس تفاصيل حياتك البسيطة بأبسط الموارد وتحاول ترهم كلشي شكد متكدر حتلو ميرهم بسهولة...
تعليقات
إرسال تعليق