مرحباً ايها العالم,
انا ياسر من العراق-بغداد واعيش حالياً في تركيا,
اريد اتعلم برمجة لأن اني عندي شغف بالحاسبات قوي من اني صغير واريد تكون عندي قدرة انه ابرمجها وبنفس الوقت من كبرت اكتشفت انه بالبرمجة نكدر نحل كل شي تقريبا ونربطها بكلشي وهذا خله رغبتي تصير اكثر انه اتعلمها,
لكن دائما جنت متشتت ومااعرف منين ابدي حتى افهم البرمجة من صدك ومو بس اكعد احفظ, دخلت عدة كورسات وجانت نوعا ما فاشلة او اني اختياري الها غلط يمكن لأن جنت رايد شي وجان الشرح على غير اشياء, يعني مثلا اني جنت رايد اصير مبرمج بس جنت داخ لبكورسات تصميم الويب وفوتوشوب وكانت كورسات ممله جدا وهذا الشي شوية وقفني او اخرني من التعلم لان كنت اظن بهالطريقة الوحيدة انه اصير او ابدي ببرمجة الويب, وهمين بسبب قلة صبري وفهمي لآلية تعلم البرمجة كنت ضايع تماما بخصوص تعلم البرمجة. قبل فترة دخلت جامعة وكان عدنا درس البرمجة102 هو بلغة C ولأن اني دخلوني للجامعة بالفصل ال2 بسبب كورس اللغةB2 الجنت داخله, فمن دخل للدرس مجنت افهم عالمدرس لان اولا كان يشرح شي متقدم وثانيا لغة الانكليزية كانت ركيكه وانا جدا اتشتت لمن مدرس يخربط باللغة اليستخدمها او كلامه مخربط, فعفت المحاضرات وصرت اقرا اللغة وحدي من اليوتيوب, ولمن بديت ادرسها جنت داشوف نفسي دا افهمها بشكل اكبر واسرع من لما جنت اتعلم جافاسكربت من ردت اتعلم اول مره قبل كم سنة, لغة ال C محدده بكلشي وواضحه اكثر من JS, لكن دراستي باليوتيوب موصلتني للمرحلة اللي ردتها موصلت لمرحلة الاشياء المطلوبه بالكورس مثلا وهي اشياء متقدمة, المدرس انطانا مصدر لكن كلما اريد اقراه اقره شوية منه واتركه لان عندي نوع من الاكتئاب وانه مااكدر اركز وبسرعة اتشتت وهمين لأن شاشة لابتوبي مو كلش واضحه بخصوص الكتابة فعيوني تتأذه منها وبالاخير عقلي فكنت اتجنب الكتاب لان تركيزي ميطول من اقرا وبالزايد اقرا فد صفحة صفحتين, لكن مؤخرا اكتشفت انه الطريقة الاسلم الي حاليا انه ادرس هالكتاب وبهذا راح اضبط اساسيات البرمجة بشكل كبير وايضا راح افهم المواد المكدرت افهمها اللي شرحها المدرس مال هذا الكورس, وعلمود اسوي هالشي راح اقسم صفحات الكتاب عالايام بحيث لازم اقراه فد 34 صفحة باليوم وحتى اركز راح استخدم طريقة انه اخلي مؤقت سشنات كل 15 دقيقة اخذ استراحه قصيرة فد دقيقتين حتى اكدر ابقه مركز لأن تركيزي ديتشتت بسهولة ومداكدر اركز 25 دقيقة كاملة ك تقنية الpomodoro.
تعليقات
إرسال تعليق