هدفي من المشاركة هو حتى التزم بشيء واكمله للأخير وازيد من تركيزي واقلل من اكتئابي. من اكمل هذا الكتاب اني راح اكون متعلم عدة اشياء, اولها زيادة تركيزي عالشي الداسوي وإكماله (عندي مشكلة بهالخصوص). وثانياً, تطوير لغتي الانكليزية (كثير مصطلحات مااعرفها وداترجم هواي). وثالثاً, المنحة كانت حافز كبير لأنها ممكن تساعدني احسن من صحتي النفسية...
دا اطور واسترجع مهارات القراءة عندي لأن عندي مشكلة تطورت وهي انه مااكدر اركز واكمل كتاب او شيء مهما كنت مهتم به. خلال هالفترة الراحت اني طورت مهارات القراءة عندي, مع انه شيء بسيط جداً, لكنه كبير بالنسبة الي- اذا استمريت بي- لأن اني دا اتعب كلش هواي حتى اركز, واقيس الوقت, واعرف كم صفحة دا اقرا بهالوقت المعين وداحسنه رغم شعوري بالاحباط من تقدمي البطيء! داواجه صعوبة انه اركز ومااتذكر شي او احساس سيء او اي شيء ثاني يشتتني اثناء القراءة, بس حتلو ما اجتني فكرة او سويت غير شي فتركيزي ديكون صعب لأنه دتصير عندي حالة انه اركز كلش زايد بالشي الداسوي بغاية افهمه زايد ف انسه الموضوع الاصلي وابقه ابحوش بالنت عن اشياء فرعية, وهذي حالة قهرية داكتشفها واحاول اقللها. التوقعات عن نفسي فاجئتني واكتشفت انه مستواي صاير سيء لأنه مثلا اول شي قسمت الوقت 34 صفحة باليوم ولكل صفحة 15 دقيقة, اول 3 ايام كانت مثل التهيئة وبقيت بيها بس آكل زين وأتمرن وانام, اما اليوم ال4 فبديت اتبع الآلية, منجحت, واُحبطت, لكن ايقنت شيء هو انه صحتي تحسنت وبالتالي قابليتي عالقراءة ممكن تتحسن, طبعاً الإحباط لأنه شفت انه دا استغرق بالصفحة يوم كامل مثلاً مع انه قبلها جانت النص-صفحة تستغرق يوم كامل, واعرف هذا شيء غير جيد, لكن المهم اكو تقدم, ودازيد عدد الصفحات تقريبا صارن 3 هههه; ماراضي بيه كلش آني, لكن الاعرفه, استمراري راح يخليني اعبر هالخطوات بشكل أُسي بالاستمرارية, وداستخدم timer يساعدني بقياس ادائي.
تغيير الخطه ممكن يستمر لأن اريد اكمل بالتحدي لآخر شي ومهما كان تقدمي بطيء او صعب. غيرت التقسيم قبل 3 ايام سويته كل يوم رقم معين ويتضاعف, منجح, لكن بما أنو داتطور بقابليتي عالتركيز والقراءة, ودالاحظ هالشي, فباجر راح اخلي خطة جديدة وارجع اكمل, لأن اكتشفت انه اهم شي الاستمرارية, وانه مهما حسينا انه الشي الدنسوي ماله فائدة لان تقدمنا بطيء, فبالنهاية الناتج التراكمي للاستمرار راح يحفزنا نتطور, وآني ممتن لأني لاحظت هالشي بهالتحدي, وانه هذا التحدي انطاني الحافز انه تكون عندي رغبة استمر بالشي حتلو كنت مُحبَط. هذا التحدي يخليني استمر رغم الاحباط وهذا يعني انه ادراكي انه النتائج القليلة افضل من عدم وجود نتائج, وانا ممتن لهذا الإدراك, وممتن انه هذه المبادرة دتساعدني استعيد نفسي.
تعليقات
إرسال تعليق