مدونة اليوم 20

كل يوم بهذا التحدي دا احاول اقرا عدد معين من الكتاب C How to program وافهم الكونسبتس(المصطلحات الموجودة بالكتاب والاشياء المرتبطة بيها.) وهدفي من بداية التحدي جانت انه اكمل الكتاب بنهاية ال29 يوم واقدر افهم البرمجة بشكل افضل حتى اطور نفسي بيها واتعمق بالمجال بعدين.

التحدي هذا فادني هواي انه مو بس اضوج لمن ما اكمل التاسك, او افشل, وانما الضوجه الاكبر دتصير انه اكو ناس دتراقب ومنتظره مني نتائج وفشلي هذا هالمرة راح يبين اكثر, الي وللأخرين ايضاً, فبالتالي مهما فشلت وردت ابطل وشفت نفسي واكف بمكاني, اني اكو ناس ورايه دتشوف تقدمي اللي توقف ومكمل, وآني وعدت بتقدم مهما تاخرت, ولهذا لازم اكمل لسببين الأول انه اني اعرف انه داتقدم وتقدمي مديبين لأنه دابدي من مرحلة سيئة مو لأن اني مداحاول, الشي الثاني انه اني راح ابدو شخص غير جدي وغير باذل لأي مجهود بالتحدي اذا توقفت بدون ماشوف اللي ديقرا انه اني مع ان تقدمي ديبين بطيء من خلال عدد الاوراق, لكن المقياس الحقيقي هو اني مو الاوراق. مع انه الاحباطات هواي والمشاكل تظهر دائما, لكن دا اتعلم انه اتعامل وياها بشكل منفرد وانه اكو تاسك عليه لازم اسويه مهما يكون وبنهاية ال29 يوم لازم اسويها لو اعرف اقرا 100 صفحة باليوم. بهذني ال10 ايام الراحن, هواي ايام من عدهن كنت محبط جدا, لكن رغم الاحباط احاول, حتلو تخليت عن بعض من خططي او ادواتي وحسيتها مدتفيدني او انه اي شي مديفيدني, بالاخير دائما لازم ارجع اسوي خطة جديدة واكمل. هذا الفيديو صورته بلحظة حسيت نفسي مركز بعدما سويت هالأجواء فردت اشوفكمياها.

اني غيرت سابقا الخطط وراح ابقه اغيرها المهم انه اوصل للهدف مهما فشلت بالالتزام بالخطة وجانت مو عملية لسبب ما,

بالسابق جنت استخدم Timer لتقييم تقدمي, بس لمن شفت هذا التايمر مديفيدني وانه عقلي ديتشتت ويتوقف عن القراءة بوقت مقارب لوقت توقف التايمر, وانه التايمر ديشتتني اكثر ويخليني قلق, تركته, وكلت الاهم انه اني اركز اكثر, واذا التايمر ديعرقل تركيزي نوعا ما فالافضل اعوفه; ومن عفته تحسنت اكثر وصرت اقرا واركز بالقراية اكثر. اليوم مثلا قريت من صفحة 49 الى 90 بعدما كان تقدمي سابقا 1-2 صفحة باليوم كمعدل. وبنهاية هال29 يوم راح اكون محقق الهدف الاول انه استرجع واطور قابليات القراءة عندي واتخلص من الاحباط وهذا يتم بقراءة هالكتاب, واني ممتن انه هالتحدي ديخليني اغير من طريقة تفكيري.