اليوم 12؟
اوك اليوم هو اليوم الثاني بعد ال10 ايام, ادري انته هسه عزيزي القارئ كاعد دتضحك, ودتكول شنو هذا الMطي اللي وصل 3 صفحات باليوم اكيد مديبذل جهد كفاية!
اوك اني وياك 3 صفحات باليوم مو شيء معتبر, وشي تافه, ويمكن اقل واحد انسان عادي ممكن يكدر يقرا 40 صفحة باليوم- اني جنت اكدر اقرا اكثر بهواي- لكن خلي ببالك انه اكو عوائق نفسية, مكانية, وبالاضافة لهذا انه ال3 صفحات هاي مو معناها انه اني طول اليوم دا اقرا بنفس هذني ال3 صفحات, لاحبيبي.
العوائق هي اولاً الكتاب انكليزي ويحتوي مصطلحات تقنية وكلمات اني مشايفها سابقا ف اروح ابحث عنها واحاول افهم المعنى الحقيقي مالتها, وايضاً ابحث عن الكلمات والمصطلحات الجديدة اللي تطلع وتفسر هذا المعنى, وايضاً اتعلم كتابتها ولفظها, وبعدين ابحث عن فلان مؤسسسة مذكورة بالصفحة هاي واروح اقرا عنها وهم اترجم كلشي داقراه وانتبه للspelling... وبعدين تجيني افكار او اشياء اني ناسيها واروح ابحث عنها والخ, وبما انو اني معايش ويا اجانب ولا حاجي ويا اجانب الا نادرا واكثرها كانت دردشة كتابية وبمصطلحات عامة, واني المصطلحات المهمة احس انه لازم افهمها كلش, ف ابقه احاول افهمها يوميه اكثر حتلو كنت اعرف معناها سابقا بس اريد افهم معناها او معانيها اكثر يعني مثلا بالعربي من نقول: وينك يمعود؟ هاي الجملة الها فد يمكن 10 معنى مختلف حسب الشخص وقصده, ففهم المصطلحات مو شي يجي من مجرد القراءة, يحتاج سمع! ولهذا استخدمت فد قارئ شاشة بس مستمريت عليه لأن بي بعض الاخطاء وهمين اكو اشياء ميلفضها صح واستخدمت غيره وهمين مفادني لأن يحجي كلش بطيء ويخربط اذا ردت اعبر لمقطع او ارجع لمقطع معين مااكدر.
بالاضافة لهذا, ف آني تركيزي وتفكيري مشتت واسوي اشياء ثانيه او افكر باشياء ثانيه, دائما بالي مشغول, وما ابقه اصلا اقرا بسبب التشتت والحالة النفسية السيئة ولهذا يعني من اكول 3 صفحات باليوم هاي يعني ممكن يكون الوقت القريت بي الفعلي هو ساعة وحدة او اقل بهواي ماادري بالضبط.
تعليقات
إرسال تعليق